افغانستان میں دہشتگردی کے واقعات پر جلد قابو پالیں گے، ذبیح اللہ مجاہد

کابل(ویب ڈیسک) افغانستان کے نائب وزیرِ اطلاعات ذبیح اللہ مجاہد کا کہنا ہے کہ افغانستان میں دہشتگردی کے واقعات پر جلد قابو پالیں گے۔

تفصیلات کے مطابق افغانستان کے نائب وزیرِ اطلاعات ذبیح اللہ مجاہد نے کابل میں نیوز کانفرنس کرتے ہوئے کہا کہ وزیراعظم عمران خان کی امن کیلئے کوششیں مثبت ہیں۔

ذبیح اللہ مجاہد نے کہا ہے کہ پاکستان افغانستان کے معاملات میں مداخلت نہیں کررہا، عبوری حکومت میں مختلف مسالک کے لوگوں کو شامل کیا گیا، ہم مشترکہ حکومت بنانے کی طرف بڑھ رہے ہیں۔

انہوں نے کہا ہے کہ افغان عوام میں داعش کے خلاف نفرت پائی جاتی ہے، داعش افغانستان میں تنظیم کی شکل میں موجود نہیں، افغانستان میں مخلوط حکومت کے معاملے پرعمران خان سے بات کی، افغانستان میں امن کیلئےعمران خان کی کاوشیں قابل ستائش ہیں۔

ذبیح اللہ مجاہد نے کہا کہ مداخلت نہیں چاہتے، امداد کرنے والوں کا خیرمقدم کریں گے، پاکستان، قطر، چین اور افغانستان میں امن کیلئے کردار اداکررہے ہیں، وزیراعظم عمران خان کے بیان کا خیرمقدم کرتے ہیں، عمران خان کی کوششوں کو مداخلت نہ سمجھا جائے، پاکستان کے افغانستان کے ساتھ سیاسی روابط ہیں، افغانستان میں دہشتگردی کے واقعات پر جلد قابو پالیں گے، ننگرہار اور جلال آباد میں دہشتگردی کے واقعات کی مذمت کرتے ہیں۔

افغانستان کے نائب وزیرِ اطلاعات ذبیح اللہ مجاہد نے مزید کہا ہے کہ عالمی برادری نئی افغان حکومت کو جلد تسلیم کرے، عالمی برادری کے مثبت مشوروں کی قدر کریں گے۔