پاکستان کے کامیڈین کنگ اور لیجنڈری اداکار عُمر شریف کی اہلیہ زرین غزل نے شوہر کے انتقال کے بعد سوشل میڈیا پر پہلی پوسٹ شیئر کردی۔
عُمر شریف کی اہلیہ نے فوٹو اینڈ ویڈیو شیئرنگ ایپ انسٹاگرام پر اپنے مرحوم شوہر کی یادگار تصویر شیئر کی۔
اُنہوں نے اپنے عُمر شریف کے نام خصوصی شعر لکھا کہ جو دِلوں کو فتح کرلے وہی فتح زمانہ ہے۔
زرین نے اپنی پوسٹ میں عُمر شریف کی تاریخ پیدائش اور تاریخ وفات بھی درج کی۔
زرین نے صارفین سے اپیل کرتے ہوئے لکھا کہ جمعہ مبارک کی دُعاؤں میں اپنے عُمر شریف کو ضرور یاد رکھیے گا۔
اُنہوں نے لکھا کہ اللّہ تعالیٰ، عُمر شریف کو جنت الفردوس میں اعلیٰ مقام عطا فرمائے، آمین۔
واضح رہے کہ شدید علالت کے بعد گزشتہ دنوں لیجنڈری اداکار و کامیڈین عمر شریف جرمنی کے اسپتال میں انتقال کر گئے۔
عمر شریف کافی عرصے سے عارضہ قلب، گردے اور دیگر مختلف بیماریوں میں مبتلا تھے۔
یاد رہے کہ عمر شریف نے اپنے کیریئر کا آغاز 1974ء میں 14سال کی عمر میں اسٹیج اداکاری سے کیا تھا اور ناصرف ملک میں بلکہ سرحد پار بھی بہت مقبولیت حاصل کی، 1980ء میں پہلی مرتبہ آڈیو کیسٹ پر اپنے ڈرامے ریلیز کیے تھے۔
انہوں نے تقریباً 5 دہائیوں تک شوبز میں کام کیا ہے اور درجنوں، ڈراموں، اسٹیج تھیٹرز اور لائیو پروگرامز میں پرفارم کیا۔
0 تبصرے