استحکام پاکستان پارٹی (آئی پی پی) نے اپنا منشور تیار کرلیا ہے جس کے اہم نکات بھی سامنے آ گئے ہیں۔
تفصیلات کے مطابق استحکام پاکستان پارٹی کی جانب سے تیار کیے گئے منشور میں بتایا گیا ہے کہ اسلامی معاشرے کا قیام، تحفظ ختم نبوتؐ و ناموس رسالت اور مدارس کو قومی دھارے میں شامل کرنا ہے۔
منشور کے مطابق زرعی اصلاحات، ساڑھے بارہ ایکڑ زمین تک کے کاشتکاروں کو ٹیوب ویلوں کی بجلی کی مفت فراہمی کی جائے گی اور مزدوروں کی کم از کم تنخواہ 50 ہزار روپے و لازمی انشورنس، شہریوں کو 300یونٹس تک بجلی مفت دی جائے گی۔اس کے علاوہ کچی آبادیوں کے لئے مالکانہ حقوق، شہریوں کیلئے اپارٹمنٹ بلڈنگز کے کم لاگت میں رہائشی منصوبے تیار کیے جائیں گے اور ایئر کنڈیشنڈ پبلک ٹرانسپورٹ، بزرگ شہریوں، خواتین اور اسٹوڈنٹس کیلئے مفت سفری سہولتیں فرہم کی جائیں گی۔
منشور میں بتایا گیا کہ استحکام پاکستان پارٹی نے موٹر سائیکل سواروں کو پیٹرول کی آدھی قیمتوں پر فراہمی کا منصوبہ بنانے کا فیصلہ کیا اور ملک کے لئے آزادانہ اور خودمختار خارجہ پالیسی یقینی بنانے کا وعدہ بھی کیا۔استحکام پاکستان پارٹی کے منشور میں بتایا گیا کہ پولیس، عدلیہ اور ٹیکس کے نظام اصلاحات لائے گی۔ یوتھ اور خواتین کیلئے آسان شرائط پر بلا سود قرضوں و ملازمتوں کی فراہمی اور ٹیکنیکل مراکز کا قیام بھی عمل میں لایا جائے گا۔علاوہ ازیں نئے سرکاری میڈیکل و انجینئیرنگ کالج کا قیام، بیرون ملک سکالر شپ کی فراہمی منشور کا حصہ ہوگی اور لوکل ٹور ازم انڈسٹری کا فروغ، ملکی و غیر ملکی سیاحت سے مقامی تجارت کی ترقی بھی منشور کا حصہ ہوگی۔واضح رہے کہ استحکام پاکستان پارٹی کا منشور منظور ہو گیا اور اہم شعبوں میں بڑے پیمانے پر اصلاحات لانے کا عندیہ بھی دے دیا گیا۔
0 تبصرے