محرم الحرام ہمیں قربانی اور حق سچ پر کھڑے رہنے کا درس دیتا ہے، محسن نقوی

محسن نقوی نے کہا ہےکہ محرم الحرام ہمیں قربانی اور حق سچ پر کھڑے رہنے کا درس دیتا ہے۔

تفصیلات کے مطابق نگراں وزیراعلیٰ پنجاب محسن نقوی نے محرم الحرام کے آغاز پر اپنے ایک پیغام میں کہا کہ محرم الحرام ہمیں قربانی اور حق سچ پر کھڑے رہنے کا درس دیتا ہے، علماء کرام و مشائخ عظام نے ہمیشہ ملک وقوم کی رہنمائی کی ہے۔انہوں نے کہا کہ محرم الحرام کے دوران امن او ریگانگت کی فضا برقرار رکھنے کیلئے علماء کرام و مشائخ عظام کی خدمات کو فراموش نہیں کرسکتے۔

نگراں وزیراعلیٰ پنجاب نے یہ بھی کہا کہ محرم ا لحرام کے دوران تمام مکاتب فکر کے علماء کرام و مشائخ عظام کو بھائی چارے،مذہبی ہم آہنگی اور رواداری کو فروغ دینا چاہیے۔ان کا کہنا تھا کہ مجھے امیدہے کہ موجودہ حالات کی نزاکت کے پیش نظر علماء کرام و مشائخ عظام ہمیشہ کی طرح یگانگت، یکجہتی او ربھائی چارے کو فروغ دیں گے۔محسن نقوی کا یہ بھی کہنا تھا کہ آج وطن عزیز کو ہر محاذ پر چیلنجز کا سامنا ہے، ہم نے بحیثیت قوم اتحاد اور اتفاق کی رسی کو پکڑ کر ان چیلنجز سے نمٹنا ہے۔

انہوں نے کہا کہ وطن عزیز کی مٹی ہم سے تقاضا کرتی ہے کہ ذاتی مفادات اور گروہی اختلافات بھلا کر ایک ہوجائیں، محرم الحرام کے آغاز پر میرا پیغام ہے کہ ہماری نجات اسوہ حسنہ ؐ اور فلسفہ حسینؓ پر عمل پیرا ہونے میں ہے۔نگراں وزیراعلیٰ پنجاب محسن نقوی نے مزید کہا کہ ہمیں باہمی اتحاد اور ہم آہنگی کے ذریعے دشمن کے ناپاک عزائم کوخاک میں ملانا ہے، نواسہ رسولؐ نے اپنے کردار اورعمل سے حق کی آواز کو بلند کرنا اورانسانی اقدار کاتحفظ سکھایا، حضرت امام حسین ؓ کی جدوجہد ظلم کیخلاف سینہ سپر ہونے کاابدی پیغام ہے۔