توہین الیکشن کمیشن؛ چیئرمین پی ٹی آئی ودیگر کے ناقابل ضمانت وارنٹ گرفتاری جاری
اسلام آباد: الیکشن کمیشن نےتوہین الیکشن کمیشن کیس میں چیئرمین پی ٹی آئی، اسد عمر اور فواد چوہدری کے ناقابل ضمانت وارنٹ گرفتاری جاری کردیے۔تفصیلات کے مطابق چیئرمین پی ٹی آئی عمران خان، اسدعمر اور فواد چوہدری کے خلاف توہین الیکشن کمیشن کیس کی سماعت ممبر الیکشن کمیشن نثار درانی کی سربراہی میں 4 رکنی کمیشن نے کی۔اسد عمر کی جانب سے معاون وکیل عمائمہ منصور الیکشن کمیشن پیش ہوئے جبکہ چیئرمین پی ٹی آئی اور فواد چوہدری کی جانب سے کوئی پیش نہیں ہوا۔
اسد عمر کی معاون وکیل نے الیکشن کمیشن میں کیس سماعت ملتوی کرنے کی درخواست کردی۔معاون وکیل نے کمیشن کو بتایا کہ انور منصور میڈیکل چیک اپ کیلئے چھٹیوں پر ہیں، اسد عمر بھی میڈیکل چیک اپ کے سلسلے میں مصروف ہیں۔ممبر اکرام اللہ خان نے کہا کہ اس طرح تو ہر مرتبہ سماعت ملتوی نہیں کرسکتے، اس طرح تو کیس ختم ہی نہیں ہوگا۔الیکشن کمیشن نے توہین الیکشن کمیشن کیس میں چیئرمین پی ٹی آئی، اسد عمر اور فواد چوہدری کے ناقابل ضمانت وارنٹ گرفتاری جاری کرتے ہوئے کیس کی مزید سماعت 25 جولائی تک ملتوی کردی۔
0 تبصرے